"Bryndillinn" mættur

Nú á dögunum kom í vörslu Búvélasafnsins fyrsti sæðingabíllinn sem Borgirðingar notuðu - við Sæðingastöðina á Hvanneyri. Það var rétt um miðja síðustu öld. Bíllinn er af gerðinni Dodge (Ambulance); árgerð 1942, furðu vel varðveittur. Hann gekk undir nafninu Bryndillinn. Bílinn á Björn Guðmundsson á Laugum í Reykjadal, en það var Pétur Jónsson vélameistari sem hlutaðist til um komu bílsins í Búvélasafnið og vistun þar.

Bílasöfnun er ekki hlutverk Búvélasafnsins en saga þessa bíls er hluti af tæknisögu landbúnaðarins svo eðlilegt er að bjóða hann velkominn í Búvélasafnið.

Þegar sæðingar hófust í Borgarfirði var vegakerfi sveitanna afskaplega ófullkomið. Það var því nauðsynlegt að hafa dugmikla bíla til þess að koma erfðaefninu á bæina. Þá kom sér vel að hafa Weapon. Auk þess var bíllinn notaður til skólaaksturs, því sæðingaaksturinn var ekki umfangsmikill á þessum byrjunarárum.

Bílnum verður komið fyrir í hinni nýju geymslu Búvélasafnsins.

Hvenær er safnið opið?

Netfang: bjarnig@lbhi.is
Sími: 844 7740

(einnig 433 5000)

Nafn dagsins er

Ágúst Andrés Jónsson

Nafn dagsins er Ágúst Andrés Jónsson. Hann var fæddur 28. júní 1907 í Reykjavík. Hann nam við Hvítárbakkaskólann veturinn 1924-1925. Lauk síðan rafvirkjanámi og varð einn umsvifamesti rafverktaki í höfuðborginni með fyrirtæki sínu, Rafvirkjanum sf á Skólavörðustíg 22. Ágúst dvaldi ungur um fjörgurra ára skeið í Alaska og Bandaríkjunum og kynnst atvinnuháttum og fólki þar vestra. Hann hafði einnig mikinn áhuga á landbúnaði og keypti jörðina Hraunkot í Grímsnes, lítt og illa hýsta. Jörðin stórbætti Ágúst og hóf að gera þar margvíslegar landbúnaðartilraunir, m.a. með ræktun korns, baunagrass, ýmissa afbrigða af kartöflum ofl. Þá reyndi hann einnig ýmsar nýjungar í verktækni og vélum til búskapar. Alifuglarækt stundaði hann einnig, ræktaði m.a. Peking-endur og kalkúna, en þeir höfðu ekki verið aldir hérlendis áður.

Nánar

Fyrri nöfn dagsins