Búvélasafnið stækkar

Í júnímánuði var tekin í notkun viðbót við sýningarhúsnæði Búvélasafnsins. Salur sem áður hýsti verkstæðiskennslu Landbúnaðarháskólans var rýmdur og lagfærður, en kennslan verður nú færð í nýlegt hús Bútæknideildar Rala. Í hinu nýja húsnæði munum við hægt og sígandi koma fyrir móttöku og forsal safnsins í samræmi við verkáætlun Björns G. Björnssonar hjá List & Sögu. Þar hefur þegar verið komið fyrir jarðvinnsluáhöldum Torfa í Ólafsdal og fleira er í undirbúningi.

Með þessum breytingum vex sýningarhúsnæði Búvélasafnsins til mikilla muna. Þannig verður unnt að rýmka á sýningargripum og gera það auðskoðanlegra fyrir gesti.

Í júnímánuði var einnig tekið í notkun hið nýja geymsluhúsnæði Búvélasafnsins sem áður var sagt frá. Tekst þar að koma í geymslu fjölmörgum gripum sem áður voru í misjafnri vist. Segjum meira frá því síðar.

Hvenær er safnið opið?

Netfang: bjarnig@lbhi.is
Sími: 844 7740

(einnig 433 5000)

Nafn dagsins er

Ágúst Andrés Jónsson

Nafn dagsins er Ágúst Andrés Jónsson. Hann var fæddur 28. júní 1907 í Reykjavík. Hann nam við Hvítárbakkaskólann veturinn 1924-1925. Lauk síðan rafvirkjanámi og varð einn umsvifamesti rafverktaki í höfuðborginni með fyrirtæki sínu, Rafvirkjanum sf á Skólavörðustíg 22. Ágúst dvaldi ungur um fjörgurra ára skeið í Alaska og Bandaríkjunum og kynnst atvinnuháttum og fólki þar vestra. Hann hafði einnig mikinn áhuga á landbúnaði og keypti jörðina Hraunkot í Grímsnes, lítt og illa hýsta. Jörðin stórbætti Ágúst og hóf að gera þar margvíslegar landbúnaðartilraunir, m.a. með ræktun korns, baunagrass, ýmissa afbrigða af kartöflum ofl. Þá reyndi hann einnig ýmsar nýjungar í verktækni og vélum til búskapar. Alifuglarækt stundaði hann einnig, ræktaði m.a. Peking-endur og kalkúna, en þeir höfðu ekki verið aldir hérlendis áður.

Nánar

Fyrri nöfn dagsins