12. apríl 2016

Hvaða verkfæri er þetta?

Á dögunum heimsótti heimsíðungur borgfirskt býli. Eftir kaffi með góðgerðum gengum við út að gamalli skemmu. Þaðan, ofan af lofti, dró bóndi fram verkfæri, sem hann kvað lengi hafa verið til á bænum en enginn vissi lengur til hvers það hefði verið notað.

 

Bóndi fékk safninu gripinn en nú er spurt:

Kannast einhver við verkfærið?

 

Nánari lýsing með myndunum fylgir hér á eftir. 

 

Gripurinn er gerður úr tré, mjög vönduð smíði, líklega lökkuð upphaflega.

 

Meginhlutinn er trog, 37 cm breitt og um 60 cm langt.

 

Trogið veltur um botn sinn svo úr því má auðveldlega steypa innihaldinu.

 

Sýnilega hefur verið möndull í troginu undir þverspýtunni sem blasir við, möndull til mölunar? Pressunar? Ef til vill þannig að hráefnið hefur færst úr öðrum helmingi trogsins yfir í hinn.

 

Á hlið gripsins er málskjöldur og á honum stendur Richard & Naveau RINA constructeurs Rueil (S.O.)

 

Gúgúll virðist ekki koma nöfnunum fyrir sig, en bendingar eru þó um franskan uppruna en gripurinn er sýnilega erlendur.

 

Er einhver lesandi sem hefur grun um hvaða gripur erhér á ferð og til hvers hann hefur verið notaður?