Hvar er þessi mynd tekin?

Heimildarmaður Landbúnaðarsafns sendi okkur þessa ljósmynd. Þar er slegið með að því er best verður séð Herkules-hestasláttuvél, líklega eldri gerð hennar. Við höldum að þarna sé verið að slá grænfóðurhafra (eða -bygg). Giskum á að myndin hafi verið tekin um eða skömmu fyrir 1940?

Málið er hins vegar það að fyrir okkur þvælist hvar myndin er tekin. Ljósmyndarinn hét Finnjón Mósesson (1896-1962).

Getur þú, ágæti lesandi, séð hvaðan myndin er?

Og svo minnum við enn á spurningalistann okkar um hestasláttinn. Aðeins hafa komið fyrirspurnir um hann undanfarið.

Við heitum á hvern þann sem lagt getur lið og vill leggja okkur lið að gera það, nóvember er fínn mánuður til slíkra verka.

Hvenær er safnið opið?

Netfang: bjarnig@lbhi.is
Sími: 844 7740

(einnig 433 5000)

Nafn dagsins er

Ágúst Andrés Jónsson

Nafn dagsins er Ágúst Andrés Jónsson. Hann var fæddur 28. júní 1907 í Reykjavík. Hann nam við Hvítárbakkaskólann veturinn 1924-1925. Lauk síðan rafvirkjanámi og varð einn umsvifamesti rafverktaki í höfuðborginni með fyrirtæki sínu, Rafvirkjanum sf á Skólavörðustíg 22. Ágúst dvaldi ungur um fjörgurra ára skeið í Alaska og Bandaríkjunum og kynnst atvinnuháttum og fólki þar vestra. Hann hafði einnig mikinn áhuga á landbúnaði og keypti jörðina Hraunkot í Grímsnes, lítt og illa hýsta. Jörðin stórbætti Ágúst og hóf að gera þar margvíslegar landbúnaðartilraunir, m.a. með ræktun korns, baunagrass, ýmissa afbrigða af kartöflum ofl. Þá reyndi hann einnig ýmsar nýjungar í verktækni og vélum til búskapar. Alifuglarækt stundaði hann einnig, ræktaði m.a. Peking-endur og kalkúna, en þeir höfðu ekki verið aldir hérlendis áður.

Nánar

Fyrri nöfn dagsins