Kanínudagurinn á Hvanneyri ...

Þrátt fyrir súldina var ýmislegt um að vera á Hvanneyri í gær: Kanínubændur kynntu kanínurækt í Halldórsfjósi eins og þeir gerðu fyrir ári síðan. Athyglisverð búgrein sem getur verið drjúg búbót. Ekki síst glöddu kanínurnar yngstu gestina.

Þá var gerð tilraun með kaffiveitingar í Skemmunni góðu en í undirbúningi er að þær verði fastur liður um helgar í sumar, eins og nánar verður kynnt.

Margir gestir litu við í Landbúnaðarsafni sem og Ullarselinu sem nýtur mikilla vinsælda, en þar boðin úrvals vara, bæði til frekari vinnslu og fullunnin, úr alíslenskum hráefnum.

Í hópi gesta var m.a. 20 bíla flokkur húsbílaeigenda er þessa helgi nutu náttúrufegurðar í Borgarfirði.

Allt eru þetta dæmi um vaxandi umsvif á Gamla staðnum svokallaða á Hvanneyri, svæðinu þar sem búnaðarskólinn var byggður upp í lok nítjándu aldar og byrjun hinnar tuttugustu.

Hvenær er safnið opið?

Netfang: bjarnig@lbhi.is
Sími: 844 7740

(einnig 433 5000)

Nafn dagsins er

Ágúst Andrés Jónsson

Nafn dagsins er Ágúst Andrés Jónsson. Hann var fæddur 28. júní 1907 í Reykjavík. Hann nam við Hvítárbakkaskólann veturinn 1924-1925. Lauk síðan rafvirkjanámi og varð einn umsvifamesti rafverktaki í höfuðborginni með fyrirtæki sínu, Rafvirkjanum sf á Skólavörðustíg 22. Ágúst dvaldi ungur um fjörgurra ára skeið í Alaska og Bandaríkjunum og kynnst atvinnuháttum og fólki þar vestra. Hann hafði einnig mikinn áhuga á landbúnaði og keypti jörðina Hraunkot í Grímsnes, lítt og illa hýsta. Jörðin stórbætti Ágúst og hóf að gera þar margvíslegar landbúnaðartilraunir, m.a. með ræktun korns, baunagrass, ýmissa afbrigða af kartöflum ofl. Þá reyndi hann einnig ýmsar nýjungar í verktækni og vélum til búskapar. Alifuglarækt stundaði hann einnig, ræktaði m.a. Peking-endur og kalkúna, en þeir höfðu ekki verið aldir hérlendis áður.

Nánar

Fyrri nöfn dagsins